XV Premio Raíña Lupa de literatura infantil e xuvenil.

Blue Shiva é unha adolescente e influencer nas redes sociais, onde gaña milleiros de seguidores sorteando retos perigosos que ela mesma se impón. Nun deses desafíos, Blue Shiva falece. Fada Escura, a irmá xemelga de Lúa, está namorada de Blue Shiva e, desde hai tempo, sofre unha depresión severa e outros trastornos que a levan á autolesión.
Os pais de Fada Escura están desesperados, e Lúa trata de axudar a súa irmá coa colaboración de Gabriel, ex-mozo de Blue Shiva, moi afectado tamén pola morte da adolescente. Pouco a pouco, Gabriel e Lúa namorarán.
Para saír do círculo infernal da atención e os likes Gabriel solicita entrar nun misterioso pacto que comandan Minina Bastet e Lady Idunn, dúas antigas compañeiras de Blue Shiva, de personalidade sinistra. Minina Bastet e Lady Idunn someten a Gabriel a dolorosas probas para verificar se vai en serio, xa que desconfían del.
Lúa, en colaboración con Fada Escura, asume o reto que levou á morte a Blue Shiva ao tempo que Gabriel fala publicamente sobre a auténtica e desgraciada vida de Blue Shiva e sobre como non paga a pena dedicar a vida ao mundo virtual.
Finalmente, Fada Escura recupérase da súa crise e Gabriel e Lúa reinician as súas vidas en universidades próximas.

3º-4º ESO